Postuar më: 6 June / 16:09
Estadio Do Maracana, Rio de Janeiro
Viti i ndërtimit: 1950
Kapaciteti i përgjithshëm: 76.804 (ulëse për tifozët 73.531)
I ndërtuar për Kampionatin Botëror të vitit 1950, Estadio Jornalista Mario Filho, i njohur më mirë si Maracana, atë vit solli ndeshjen e paharrueshme ndërmjet Brazilit dhe Uruguait, e cila njihet si një nga përballjet më dramatike të këtij turneu.
Stadiumi i Rio de Janeiros do të jetë sërish në qendër të vëmendjes në turneun ‘Brazili 2014’ duke qenë nikoqir i shtatë takimeve, më shumë se cilido stadium tjetër. Mes tjerash, në këtë arenë do të zhvillohet edhe finalja e 13 korrikut.
Dikur ka qenë stadiumi më i madh në botë me kapacitet për 200.000 tifozë, mirëpo tash i është zvogëluar kapaciteti në 73.531 ulëse për Kampionatin e sivjetmë Botëror. Megjithatë, akoma mbetet stadiumi më i madh në Brazil.
Duke respektuar dukjen origjinale të tij, projekti për rinovim përfshiu prishjen e unazës së poshtme të ulëseve, ndërtimin e një unaze të re duke mundësuar dukshmëri të përmirësuar, zgjerim të qasjes dhe zëvendësim të të gjitha ulëseve. Stadiumi është i pajisur edhe me kulm me një sistem të mbledhjes së plotë të shiut.
Po ashtu, Maracana bën pjesë edhe në Institutin Kombëtar të Trashëgimisë Historike dhe Artistike të Brazilit. Është njëherësh atraksioni i dytë më i popullarizuar turistik duke joshur tifozë të futbollit nga e gjithë bota.
Përballjet që do të zhvillohen në Estadio Do Maracana:
Faza grupore
15 qershor: Argjentina v Bosnje e Hercegovina
18 qershor: Spanja v Kili
22 qershor: Belgjika v Rusia
25 qershor: Ekuadori v Franca
Fazat e eliminimit direkt
28 qershor: Një takim i 1/8 së finales
4 korrik: Një çerekfinale
13 korrik: Finalja
0 komente